Қарлы шың етегін көктемнің алғашқы лебі шарпып, бәйшешек бүр жарып жатыр. Оның ақжелең гүлдері күнге қарай мойын созып, көктемді сүйіншілеп жатқандай. Жан-жағында қыстан қалған һемикриптофиттер де тіршіліктің жаңа тынысын сезуде.
Алатау бәйшешегі (Crocus alatavicus) — пиязшық арқылы көбейетін көпжылдық эфемероид өсімдік.
Оның тіршілік формасын, К. Раункиер жіктеліміне сәйкес, криптофиттерге жатқызамыз.
Криптофиттер (Cr) дегеніміз — бүршіктері топырақ не су астында жататын өсімдіктер, бұларды геофит және гидрофит деп атаймыз. Бәйшешек геофит тип тармағына жатады. Себебі оның тіршілік жалғастыратын мүшесі — пиязшығы топырақ астында жатады.
Алатау бәйшешегі көктемде ерте гүлдеп алады да, жерүсті бөлігі жаз шыққанға дейін түгел қурап кетеді. Жерасты мүшесі — пиязшығы ғана барлық мезгілде топырақ астында тіршілік ете береді. Оның мұндай ерекше тіршілік формасы өсімдікті кеуіп немесе үсіп кетуден сақтайды.